Ballina Kosovë S’ka vendim për hapjen e pishinave dhe lejimin e dasmave – Ministria thotë se duhet pritur ende

S’ka vendim për hapjen e pishinave dhe lejimin e dasmave – Ministria thotë se duhet pritur ende

Nga Republika online

Ministria e Shëndetësisë ka njoftuar se ende nuk është marrë vendim për lejimin e dasmave, hapjen e pishinave dhe veprimtarive tjera ekonomike që ishin paraparë të hapen nga korriku, raporton Express.

Përmes një njoftimi drejtuar mediave, MSh’ja ka bërë me dije se çfarëdo vendimi lidhur me këto masa, do të kumtohet nga Ministria e Shëndetësisë.

“Ndërlidhur me masat për lirimin e veprimtarive ekonomike të parapara për 1 korrik 2020, Ministria e Shëndetësisë informon institucionet dhe publikun e gjerë se informatat zyrtare për masat kundër Covid-19 në nivel vendi lëshohen vetëm nga Qeveria e Republikës së Kosovës, Ministria e Shëndetësisë, në koordinim me Institutin Kombëtar të Shëndetësisë Publike”, thuhet në njoftim.

Ministria ka lutur qytetarët që informcionet t’i marrin nga burimi zyrtar.

Ndryshe, Kryeministri i Kosovës, Avdullah Hoti, dje tha se situata me koronavirus në Kosovë “është nën kontroll të brishtë”.

Në një konferencë për media në Prishtinë, pas takimit të Komitetit për menaxhimin e situatës me koronavirus, Hoti tha se Klinika Infektive është e stërmbushur me pacientë me koronavirus dhe se atje nuk ka më vende për njerëz.

“Janë duke u krijuar vende shtesë nëpër spitale rajonale”, tha ai.

Hoti bëri thirrje që të zbatohet plotësisht vendosja e maskave, distanca fizike dhe larja e duarve.

“Jemi në rrezik nga vala e dytë, na ndihmoni që mos ta mbyllim komplet ekonominë si para tre muajve”, tha Hoti, i cili paralajmëroi masa të reja për frenimin e përhapjes së koronavirusit.

Masat e reja, që sipas tij do të merren qysh në mbledhjen e ardhshme të qeverisë, do të përfshijnë reduktimin e punës në institucione – bartësit e institucioneve duhet t’i lirojnë ata që mund të kryejnë punën nga shtëpia – pastaj mbylljen e bizneseve ku ka raste të paraqitura me koronavirus, mbajtjen në izolim të personave të infektuar dhe kontrollin e tyre, si dhe ndalimin e grumbullimit të mbi 100 personave në ambiente të hapura ose të mbyllura.

Hoti tha se ata që nuk i zbatojnë masat, do të përballen me ligjin./Gazeta Express

Mos i humb

Leni koment